Matthew 17

Yesu Dna Nwo Mwa-Mwa

1Shi aɓo bwa anyipyei tnai, Yesu wa ku a Bitrus, Yakub n wo zadoi ngye Yohanna, wa lo ɓai n ʼpe yakwo tukwo, ɓahin-ɓahin.

2Ɓa zhi ɓai shi wa wye, ɓa gye wo la shando, Owa wyebai bmiyana ngye nyipyei, Owa je ɓa ku wu bui-bui yi pau.

3Nsa gmanyi yi, ɓa gye Musa n Iliya yi nku ɓe ɓai daɓo wo yi.

4Bitrus wa ci ge, Dagayi, ko bmiya lo ya ku yi nya kpe ʼya. N ha ye, miɓa kpe alubui gun ata, gmanyi jntu ho ɓo, gmanyi ntu Musa ɓo, gmanyi ntu Iliya ɓo.

5Wo ye dna ɓeda mi, anyi buzangna nya ɓe, kwa tu ɓa fun, begye kwa gmi na nyiyi kwa gna, “Emi Nugun Yeye yi nu nyi, mi bwa gmada n woi zam. Fye vi wo ɓeda.”

6N sayi abara miya zhi na wyei knianyikun, ednai wo ɓa.

7Yesu wa ɓe wa to ɓa bwa wa gna ɓa, “Fye kuka, fye to woʼdna m.”

8Shi ɓa ɓo sha wye, ɓa bwa Yesu nu gye gni n kunsun n ɓai.

9Shi ɓa ɓo shin zhi ʼpei, Yesu wa gna ɓa ge ɓa to gna zaho-zahoi aɓo ɓa ku gye nyi m, sai wo la laka n vingwo kpa.

10Owo abara ɓa nya wo ge, “Knihin nu zhin a Yahudawayi a tukwodai gna ge sai Iliya la jeze ɓe kpa kafin Masihu wo ɓe ʼa?”

11Yesu wa gna ɓa ge ɓa da gaiciya nu, “Tile Iliya wa ɓe kpa wa zhan ʼɓo zhi dai-dai. 12Nkusun kuwa, Iliya la ɓeɓe kwo, ama a to kpe wo ye m, har a ga wo wahala. Emihin, Masihu, miɓa sin wahala n ɓa kun.” 13Gni ɓo nu abara kpe ge wo da Yohana batisma zhinyi nu ɓo.

Yesu Wa Ka Oɓi Gna

14Nɓa zo kakazhi yi nʼpe sinta, ɓagye deji zhi koi pmi ɓa. Ezaho wa ɓe wa yashi n Yesu abye wa gna, 15“Dagayi, gye mi nugun sun-sun, ntu ge wo nʼfi kpe-kpe nyasan yi lo, woi gya zhin n mwa. Nsahoyi, wa shefi nʼna ko nuwan. 16Mi la ɓe woi ho abara aba, ama ɓato mi ɓai ka wo gna m.”

17Yesu wa gna, “Efye akala-kpei, atna gaiciya ga yi, miɓa bwa atna nfyei har kni sai na? Fye ɓemi woi ya.”

18Yesu wa gnakni zafun nukwoyi nkwo ɓei dna ɓihin nyi, kwa gmi n wo, wa bwa lafiya n sayi-sayi yi.

19Avun abara nya Yesu ge, “Knihin na zhin, to yi mi yi gmi zafun nukwoyi ya ma”?

20Yesu wa gna ɓa ge ntu fye gaiciya ga gba-gbai ɓo nu. “Ntu ge fye ɓo n gaiciya gai lo ko ngye fulu byegye, fye ɓa mi fya gna epe ye ge, ‘Laka,’ kwa laka. Ɓoho to lo nkwo ta ye zhin m. 21Ama zafun nukwoyi ye pya ta ye gmiyan, sai na duwa zhin yi na zumi yi ɓe.”

22– 23Nwyi hoyi, ɓai ye fyi n Galili, Yesu wa gna ɓa ge, “Aɓa ga Mi naza kun n ɓa ɓa wu mi nyi, ama nyipyei tayi, mʼɓei je wye-wyei bwa.” Bugba wun wa bara zin.

24Ɓa si Kafarnahun a gadu goyi ɓa ɓe ɓa nya Bitrus ge, “Efye maigida ta gba gadu n?”

25Bitrus wa gna, “Sosei, wo gba.” Wa lo api mi wa da ɓo Yesu yi, ama kafin wo bwa ʼsa wa daɓo n woi, Yesu wa nya wo ge, “Bitrus, ha gye wuna? Asu kpe aza nu gadu, ko aknido da n na ku ɓa gyi nkun yi a?”

26– 27Bitrus wa gna, “Aknidoda nu.” Yesu wa gna, “Ashe akni aɓi ku pwo! Ama to ya wun ɓa bugban, lo ʼdna gbe ho she ogwo, ebmiya n ho ɓa wan nabye, ha la kwo gbe ya, ho ɓa gye agyiwye fyi nɓa ɓa kun yi gadu gba, ha ɓe cei ha ga ɓa.”